جريدة أحوال مصر
أنا هتكلم عن أسوء سلوك مَسلوك .. هتكلم ف أقذر كائن
هتكلم عن حياء البنت المنهوك .. عن التحرش اللي كائن
انت يا اللي فاكر روحك دكر .. يا اللي سيقاك الغريزه
مكتوب في ظهر البطاقه ذكر .. إنما في الوش عزيزه
مش رجوله إنك ترمِّي كلام .. أو تبص للبنت حتى بطريقه تجرحها
مبتسلمش منكم أي بنت أو مدام ..بسببكم وصلتوها تكره روحها
ليه تمشي تتلفت وراها دعاء .. ليه تمشي خايفه ف النهار جهاد
ليه أمل و ناريمان و ياما أسماء ..كرهت من أفعالكم جنس الولاد
ليه تهين نفسك ب مدة إيديك .. فاكر بيها هتقول عليك راجل
هتمد إيدها هيه رخره عليك .. و تنعتك بعلو الصوت بالسافل
و شرفك تحكيلي منظرك اللي هتقله .. بلاش ده شيئ مش فيك
قولي بالله عليك اللي واجب تخاف منه ..بإذن الله راح تنشل إيديك
يا اللي مفروض يعني إنك إنسان .. و ميزك بالعقل ربك عن الغير
ساويت نفسك كده بالحيوان .. ملهوش لزمه العقل بدون تفكير
في الحلال و في حاجه حرام .. زي ما في مفروض و في مرفوض
كل الناس من غير حتى عَلام ..عارفه إن المُتَحَرِش إنسان ممروض
كما تدين تدان يا بني آدم .. و بالكيل اللي بتكيل بيه هتُكال
هيقعدلك فعلك في الهانم .. أو أختك و أمك أو بناتك العيال
توب يلا لربك و استغفر الله .. و امتنع عن افعالك الرذيله
قبل ما يوصل عمرك منتهاه .. و ساعتها ما هتلاقي حيله
ربنا إسمه المنتقم الجبار .. هيعاقبك آخره و من قبليها دنيا
ملكش مطرح غير النار .. لو إستمريت في فعل أفعالك الدنيا
حديثي خلاص إنتهى .. أتمنى تنتهي عن وساختك
ألفاظي إللي أنا قولتها .. أقل حاجه تناسب مكانتك
