جريدة أحوال مصر
هو موظف كده على آده
راتبه فى نص الشهر بيخلص
والأسعار دايماً بتعانده
والطلبات بتزيد مش تنقص
شوفت أخينا ؟؟
يصحى الصبح مع الفجرية
راضى متوكل على مولاه
يفطر بالفول والطعمية
وياخد الشغل كمان وياه
اصله مُصلى وعارف ربه
وطالب منه الستر معاه
عمره مابص لحاجة غيره
قانع باللى المولا عطاه
حامد ربه وشاكر فضله
وطيبته زيادة اوى ياهناه
شوفت أخينا ؟؟
ويا اصحابه كتير متعاون
وقت الشدة كده موجود
اول واحد مادد ايده
يساعد فى الازمات ويجود
عمره مايبخل باللى فى ايده
وعشان ده فى شدته مسنود
شوفت أخينا ؟؟
اول شهره شايل ومحمل
بعد يومين مصروفه مـ اتحمل
لــم ايديه عشان يقدر يمشى
لأخر الشهر يلاقى ويكمل
شوفت أخينا ؟؟
بس أخينا ده برده حريص
شايل قرشين للأزمات
اصل فلوسه دايماً خالصة
أكل وشرب مع الطلبات
ويا دروس اولاده وعلاجهم
وايجارهم والجمعيات
اهو يمد ايديه ياخد منهم
احسن مايقول يا فلان هات
شوفت أخينا ؟؟
كلنا نعرف برده أخينا
اصل أخينا ده عايش بينا
واحد ضمن كتيرفى شارعنا
ساكن جنبنا .. دينه من دينا
أنت تشوفه فقير فى عيونك
وهو بصبره ورحمة ربه ليه الجنه
