جريدة أحوال مصر
كان مجبرة على دخول كلية بعينها وعندما قررت دخول مجال التمثيل اصابت نفسها بالجنون فاصبحت في ورطة من امرها وقررت الانتقام ولكن اصدقائها من الوسط الفني فضوا هذا الاشتباك فخرجت منه مؤخرا بالف سلامة ، انها الفنانة الشابة / ريهام نبيل والتي تألقت منذ دخولها مجال التمثيل منذ 4 سنوات ، فكان لنا معها هذا الحوار الصحفي :
- من هي ريهام نبيل ؟
هي فنانة شابة بتدرس ارشاد سياحي تعمل بمجال التمثيل وهي كما كل الفنانين دائما خياليين وانا بالاخص بحس اني خيالية اوفر، دائما بحب اروح اشوف الاماكن السياحية كنت بروح الاهرامات لان بحس فيها بروحانيات حلوة
- اذا لاجل ذلك درستي ارشاد سياحي ؟
لأ ، مجموعي هو الذي ادخلني هذه الكلية فقط ، انا فاشلة في الكلية لدرجة اني مش عارفة اخلصها للاسف مكملتش في دراستي لاني حبيت شغل الميديا اكثر لاني قبل التمثيل اشتغلت في كذا حاجة في الميديا
- مثل ماذا ؟
اشتغلت في شركة انتاج اعلانات وبعد ذلك وجدت اصدقائي ذهبوا ليأخذوا كورسات تمثيل ورحت معاهم – فور فان- وليس من اجل التمثيل
- في رمضان الماضي شاركتي بـ 3 اعمال درامية وكنت متألقة جدا حديثينا عن دورك في كل عمل منهم ؟
ممكن ابتديلك بـ (الف سلامة ) وهو مسلسل كوميدي بطولة : احمد عيد واستاذنا الفنان /احمد خليل وفنانين تانية كتير ، لكن دول اكثرية شغلي كان معاهم ،كنت بلعب دور (عبير ) وهي شخصية شعبية بنت بلد اسكندرانية حلمها انها تمثل ، وا/احمد خليل كان بيدور على بنته ، فكان فاكر اني ممكن اكون بنته ، فكانت شخصية بالنسبة لي صعبة شوية لاني اول ما اخذت الورق ، وجريت عينيا على كام مشهد ، تفاجئت لاني لاقيت الشخصية ممكن تلمس معايا مع شخصية (سماح ) اللي كنت عملتها في (الزوجة الرابعة ) لانها كان عندها طموح وهي بنت بلدي ، وبعدين اكتشفت ان سماح بعيدة خالص عن عبير لانها كانت فلاحة لكن عبير شعبية اينعم لكن مش فلاحة والحمد لله ربنا اكرمني وعملت الدور وطلع بشكل كوميدي كويس
- اي المشاهد كان الماستر سين بتاعك في مسلسل الف سلامة وهل كان كوميدي؟
الموضوع كله كان كوميدي بحت ، بس مشهد الماستر سين بتاعي كان مشهد درامي جدا ، كان المشهد اللي بتعرف فيه انها مصابة بـ – اللهم احفظنا – المرض الوحش – السرطان – بس انفعالها الحمد لله ماطلعش برة الشخصية انها بلدي
- فض اشتباك كانت تجربة شبابية ، حديثينا عنها ؟
(فض اشتباك ) كانت تجربة بالنسبة لي هايلة لاني انا حابة تركيبة اننا نبقى شباب و(احمد صفوت) كبني ادم هو جميل جدا فربنا كرمه بـ (فض اشتباك ) يكون بطولته وانا كنت بلعب دور (دينا ) بنت في الجامعة بتحب زياد دا اخو عمر اللي بيلعب دوره احمد صفوت وبعدين اكتشف انها مابتحبوش وهو كان عنده اعاقة
- وماذا عن مسلسل (خلف الله) وتجربتك مع الشر ؟
للاسف (خلف الله ) كان فرصة كويسة جدا اني اشتغل مع فنان كبير زي ا/ نور الشريف بس ا/ حسني صالح – مخرج العمل – للاسف لم يعطيني الفرصة لانه كان قايلي انت هيبقى ليكي دور ليه خط ولون وموضوع كبير ، وقعد قالي خطوط عريضة للشخصية فقلت له يا استاذ الورق مفهوش ده قالي انسي حاجة اسمها الورق انا بقلك ثقي فيا وامضي على ده ،ومضيت فعلا على ده بس للاسف وزعلانة جدا جدا اني مخدتش الفرصة اللي حكالي عنها فاشتغلت شخصية حسيت ان وجودها زي عدمه
- لكن انا من خلال مشاهدتي للمسلسل لاحظت ان الادوار النسائية مساحتها قليلة ؟
انا ماطلبتش دور البطولة انا كنت عايزة دور يكون له شكل فهي طوال الوقت طالعة مابتعملش حاجة في الاحداث مع ان اول مشهد عملناه كان حلو جدا لكن بعد كدة !!
- يمكن لان الوقت كان ضيق حتى يستطيعوا اللحاق بالعرض في رمضان ؟
انا معنديش مشكلة اشتغل دور صغير زي مثلا في (فض اشتباك ) بس يكون مؤثر فكانوا معرفني ان الدور صغير وعايزين ننوره ، لكن انا مشكلتي اني بثق زيادة عن اللزوم في الاخرين و لهذا السبب اشتغلت مع ا/ حسني
- ماذا تقولين للمخرج / حسني صالح من خلالنا ؟
بقوله يا استاذ انا مقصرتش في اي حاجة خالص وانا بعز حضرتك وبحترمك جدا بس كان المفروض على الاقل اعمل اللي حضرتك قلت لي عليه ولو هيبقى اقل منه يبقى بحاجة بسيطة لكن ما يبقاش مفهوش دور ، واتمنى اني اشتغل معاك في حاجة احسن باذن الله ومبروك للمسلسل
- انا عارف انك تعلمتي رقص الصالصا خصيصا لمسلسل فض اشتباك ، لكن ماذا حدث ؟
صح بس حصل اننا ماصورناش المشهد ، هو كان مشهد تخيلي ان هو ولد عنده اعاقة فهو كان بيحلم يشوف البنت اللي بيحبها ، فبيرقص معاها ، فبيكسر حتة انه شكله معاق ، لكني مش مضايقة خالص بل بالعكس انا طلعت مستفيدة اني اتعلمت رقصة مهمة زي دي ، وده مهم بالنسبة للممثل
- كم استغرقتي في تعلمها ؟
انا لسه مقدرش اقول اني بقيت محترفة لكن لسه بروح ومواظبة اني اروح مع انه بياخذ وقت طويل ، مش سهلة الصالصا لكن شط شط شا اسهل بكتير اتعلمتها في اربع خمس حصص لكن الصالصا محتاجة وقت
- من الارشاد السياحي للتمثيل ، كيف كانت البداية ؟
البداية كانت وانا في الكورس بتاع التمثيل عند د. احمد كمال ، اصحابي وزمايلي قالولي اني الحمد لله كويسة ، فاتشجعت في مرة جالي حد صديق ليا قالي تعالي اعملي كاستينج دلوقتي انت مش هتفضلي تاخذي كورس وخلاص ،وفعلا روحت عملت كاست عند ا/ شريف عرفة كان ساعتها بيعمل سيت كوم (العيادة) الجزء الثاني ، هما كانوا كل حلقة بيجيبوا ضيف شرف وفعلا عملت الكاستينج ولقيتهم بيكلموني وادوني اوردر ورحت فعلا كان فيه بسمة وادوارد وخالد سرحان واشتغلت فعلا معاهم واشتغلت اليوم ده وحسيت ان عندي باور عايزة اطلعه فكملت بقى في المجال
- الشخصية كانت كوميدي ؟
اه هي كان عندها شيزوفرينا – انفصام – مجنونة ورايحة لخالد سرحان الدكتور النفساني وبعدين حبها الدكتور التاني اللي معاهم في العيادة اللي هو ادوارد فكانت حلقة لطيفة اوي
- بعد كدة الانطلاقة حصلت ازاي ؟
ا/عمر عبد العزيز يرجع له الفضل ماقدرش انسى انه هو اللي حطني على التراك – المسار الصحيح – ، هو كان مرة بيتسحر وان كنت بنتسحر مع اهلي وكان ساعاتها عامل مسلسل (كلام نسوان) بطولة : لوسي ، وكنت متابعة المسلسل وبالصدفة الرهيبة انا نازلة اتسحر فقبل مانزل شوفت انترفيو – مقابلة تلفزيونية – مع ا/عمر وهو بيتكلم عن المسلسل ولما نزلت لقيته هناك جالس للسحور ، فطبعا قمت سلمت عليه كواحدة معجبة مش اكتر فقالي انت اسمك ايه ؟ قلتله ريهام ، قالي انت بتمثلي ؟ قلتله انا باخذ كورس وكدة فقالي خلاص اديني بس رقم تلفونك ، وفعلا 3 شهور لقيت شركة انتاج بتكلمني
- بعد 3 شهور ؟!
بالظبط ، الو ريهام ، ايوة ، ممكن تجيلينا في شركة يونيفيرسال منتجة مسلسل (امراة في ورطة) بطولة الفنانة / الهام شاهين ، ورحت فعلا قابلتهم وادوني ورق واشتغلت مع ا/عمر
- بالتأكيد الدور كان اكبر ؟
اكيد هو اللي اداني المساحة وقالي اشتغلي بقى
- ماذا عن تعاملك مع الفنانة / الهام شاهين ؟
لللاسف ماجمعناش غير مشهد واحد وانا كان نفسي يكونوا اكتر من كدة وان شاء الله اكيد هنتقابل لاني مصممة اني اشتغل معاها تاني
- وماذا عن السينما ؟
مممم ، تجاربي في السينما لم تقنعني حتى الان بس خلتني اركز شوية ، فمش بقرأ اي حاجة ، هو جالي ورق بس لسه ما حستش اني عايزة اعمله ، فمازلت افكر انا عايزة اعمل ايه ، قريبا
- شايفة ان السينما محتاجة تنازلات ؟
السينما مفيهاش كدة الفكرة انت بتعملي ده ليه ، هل في سياق درامي حقيقي ام لا ؟ ، فحتى لو مشهد هلبس فيه مايوة فلازم تكون بنت هي طبيعتها كدة ويكون مستواها كدة وتفكيرها كدة والعيلة بتاعتها كمان
- مسلسل المنتقم وهو تجربة تلفزيونية فريدة من نوعها 120 حلقة احكي لنا كيف نظرت لهذه التجربة وحديثينا عن الشخصية التي قمت بادائها ؟
(المنتقم) لازم اخد نفسي عشان اتكلم ، ياااااااه ، انا مثلت في 105 حلقة من الـ 120 فكانت تجربة طبعا صعبة ، وحلوة فكرة 120 حلقة مصري ، فلقيت الناس في الشارع متقبلين وانا معتقدة ان شاء الله انه هيحصل ده تاني وتالت هتبقى موجودة الدراما الطويلة – الساب اوبرا- فكنت مبسوطة اوي ، هي جت معايا بالحظ انا مضيت يوم خميس واخدت الورق ودخلت صورت السبت ، طبعا مكنتش عارفة اقرأ المسلسل كله 120 حلقة محتاجة شهرين على الاقل قبلها لكن ا/ احمد فوزي وا/ حاتم علي بصراحة هما قاموا بالمجهود ده معايا بالاخص لاني مكنتش عارفة دور (جيهان) خطها ايه ، فهي كانت بنت هارون الطحان اللي كان بيلعبه ا/ سامح الصريطي واخت (احمد السعدني) ابنه والفنانة الجميلة / حنان سليمان كانت مامتي
- كم من الوقت استغرق تصوير الـ 120 حلقة ؟
احنا ضغطنا على نفسنا عشان نطلع 120 حلقة في خلال 10 شهور على اربع مسلسلات كانت يا دوب ، فكان اجهاد للممثلين والمخرجين والفنيين وكل الناس كانت مجهدة جدا بس الحمد لله العمل عجب الناس والتجربة نجحت بمجموعة شبابية : عمرو يوسف وحورية فرغلي وايناس كامل بالاضافة لنا، فكان مسلسل جميل حبيته جدا وكنت سعيدة اني اشتغلت مع فريق العمل ده ، وعلى فكرة معروض عليا الان مسلسل درامي طويل مثله وان شاء يكون فاتحة خير عليا مثل (المنتقم ) .
