جريدة أحوال مصر
مصر الثكلى بتنادى
كفانى جراااااح
ولادى بيقتلوا ولادى
فى دنيا براااااح
ـــــــــــــــ
خِلافهم كان على سياسة
خِلافهم كان فى أفكارهم
والكل قال معايا الحق
اتقاتلوا …. شربت أنا نارهم
بحور الدم روت ارضى … خنقتنى
وهما خسروا أعمارهم
ــــــــــــــ
يا أمى حبيبتى سامحينى
أنا كبيرهم .. أنا حماية
من الأعداء بحميهم
لازم يتعاونوا ويايا
انادى فى خطر جانا
وحقى يسمعوا ندايا
ـــــــــــــــ
أنت صحيح اكبر ولد
لكن بالحب مش بالدم
وقت الشدة تكون سند
ولا تخلى حياتنا غم
أنت آسيت على اخواتك
وأنا شلت الهم فوق الهم
ــــــــــــــــ
وأنا بنفذ شرع الله
وحكم الدِين
بــشرعية حكمت الأرض
وحمايتها .. عليا دَين
افديها بروحى وبدمى
عاشقها بقلبى قبل العين
ــــــــــــــــ
أنت كمان مش معصوم
وليك اخطاء
وشرع الله لا قال تخريب
ولا ايذاء
لاقال تحرق ولا تدمر
ولا تروع ابرياء
ـــــــــــــــ
من أم تنادى اولادها
وتقول حبايبى سامحونى
تعالوا حكموا عقولكم
دمكم ملى عيونى
ـــــــــــــــــــ
هنقعد نحكى سوا مع بعض
ونفكر فى احلامنا
بلاش نِآسى فى قلوبنا
وندمر فى ايامنا
يومها يسعنا رُحب الارض
ونشوف نجاحنا ادامنا
ـــــــــــــــــــ
بقلب الأم بناديكم
تعالوا نبنى فى ديارنا
تعالوا شبِكوا ايديكم
قدوة وذكرى لصغارنا
عشان يفتخروا يوم بيكم
عِزة وكرامة ده شعارنا
