جريدة أحوال مصر
بدوَّر وافتش
وافتش وادوَّر
واساوى وانعكش
وبرسم واصوَّر
وبرجع ملخبط
ومُحبَط وحيد
وانام قلبى مطفى
وانا مش سعيد
وبصحى مكَسّر
وحلمى عنيد
لكن مش مفَسّر
الاقينى لابس
ونازل مشَمّر
بدوَّر عليكى
في يوم من جديد
بدوَّر عليكى
في ساحة النجوم
وحضن الغيوم
وريحة المطر
بدور عليكى
وانا كل يوم
بحارب بقلبى
وقلبى ف خطر
واقول يمكن القى
حنانك في ضِلَه
او المس خضارك
في ورقة شجر
الاقى المدينه
شوارع حزينه
ووحشة غيابك
تهد السكينه
وانا وحدى هايم
مابين البشر
بدوَّر يمين
وادوَّر شمال
على غنوه تايهه
يدِلّونى ليها
ولاد الحلال
الاقى الشوارع
مواجع مواجع
والاقى النهار
اللى هدُّه الأسى
بطعم المسا
والاقى الطيور
اللى كانت بهيجه
ومتونسه
غناها اتنسى
فبيأس وبيأس
و لحظة ما افارق
الاقى مواكب هوى ع المفارق
بيارق بيارق
بتفتح في قلبى
اذا بى افاجأ
بحبك معشش
حضنتك في قلبى
وبطَّلت ادوَّر
وبطلت افتش
