جريدة أحوال مصر
اقام المنتج/ مدحت سعد حفل صغير لابطال فيلمه “اربعة كوتشينة ” بمناسبة انتهاء مونتاج الفيلم داخل مقر الشركة
فيلم ” 4 كوتشينة ” هو فيلم لايت كوميدي غنائي استعراضي ، بطولة : هيام الجباعي ، اوكا ، اورتيجا ، شحتة كاريكا ، علاء مرسي ، حسن عبد الفتاح ،عايدة رياض ، والراحل/ غسان مطر ، وضيوف الفيلم : الاردني/ منذر رياحنة ، واللبنانية/ مروى ، وظهور خاص للجزائري الشاب/ خالد ، توزيع شركة النصر – شريف رمزي – ، تصوير / حافظ الكيلاني – ظاظا- ،انتاج شركة ارت ميوزيك للانتاج الفني – مدحت سعد – ، تأليف/ حازم متولي ، ومن اخراج / محمد جمال
وبعد تقطيع التورتة اجرينا حوار مطول مع صناع الفيلم جاء كالتالي :
الفنانة الاردنية / هيام الجباعي قالت : انا بلعب شخصية “ميادة” وهي بنت من منطقة شعبية بتهاجر مع والدها للخارج وتعود من الخارج لتلتقي بجيرانها في المنطقة واصدقاء الطفولة وتتعلق بحب “شحتة” رغم الفارق الطبقي الكبير بينهم وتساعد اصدقائها على تكوين فرقة غنائية بنوع جديد من الغناء بمساعدة منظم الحفلات “وليد منصور” ولكن تحدث بعض المشاكل واللي بيجسدها الفنان/ منذر رياحنة ، واللي وافق على الفور في الظهور بالفيلم كضيف شرف حينما طلبت منه
اما فنان المهرجنات / اوكا فتحدث قائلا : انا واحد من 3 اصدقاء عايشين في منطقة شعبية وبيقرروا يعملوا حاجة جديدة في الاغنية ، وعن اهم مشهد له قال : كان امام والدته والتي تجسدها الفنانة/ عادية رياض فالمشهد كان يتطلب مشاعر عالية حين يعود اليها بعد مشادة كلامية بينهما وتركه للمنزل
وتحدث اورتيجا وقال : انا صاحب “اوكا وشحتة” في المنطقة واحنا في الفيلم مش بس بنغني لكن مشاهد التمثيل بتاعتنا اكتر من الغناء ، وكان اهم مشهد ليا قدام الفنان/ منذر رياحنة واتلخبطت فيه وهو ساعدني وعرفني ازاي اعبر عن الكلام ده في ساعة غضب الشخصية والحمد لله عملته كويس
اما شحتة كاريكا فقال : ان شاء الله احنا عاملين فيلم هيكسر الدنيا وانا طالع بحب “هيام” رغم اني معدم وهي غنية وفيه ناس بتطاردنا في الفيلم وانا بدافع عنها فاحنا الجانب الرومانسي في الفيلم
اما المنتج/ مدحت سعد فقال : انا لما شفت الفيلم بعد المونتاج حبيت كل ابطاله لانهم عاملين استعراضات جميلة وفيلم له معنى ، وعن هيام الجباعي قال : انا قبل ما اتعرف عليها كنت شفت لها مسلسل اردني اماراتي اسمه “البريق” وهي عملت فيلم في مصر اسمه “مترو” فشفت تمثيلها جميل واتمنيت انت اشتغل معاها لانها وش مقبول للسينما المصرية وهي معانا في الفيلم عاملة استعراض وتمثيل جيد وان شاء الله تحقق مكانة متميزة بين الفنانين في مصر وانا باتنبأ ليهم بمستقبل جميل هي واوكا واورتيجا وشحتة ،
وانا باشكر كل فريق العمل وبوعد الناس انهم يتفرجوا على فيلم استعراضي له مضمون وهدف بيخاطب الناس في الطبقة الاجتماعية العليا والوسطى مش عاملين بلطجة مش عاملين سكاكين لاننا خلاص اصبحنا بشوف ده كتير واحنا بنخاف على اولادنا انهم ينزلوا السينما وان شاء الله يكون الفيلم ده تجربة جديدة راقية مختلفة في الوسط الفني
وعن سبب تأخر نزول الفيلم قال مدحت : بسبب وفاة الموزع/ محمد حسن رمزي واحنا كنا متعاقدين معاه ولما توفى احترمنا مسافة الود الموجودة بيننا واي عمل جيد بيفرض نفسه على الموزعين واحنا صارفين على الفيلم كويس وعلى الصورة ،وعلى المونتاج والطبع اللي معمول في شركة كبيرة زي “اروما” لكني اختارات التعامل مع نفس شركة التوزيع وهي شركة “النصر” لما شفت ابنه الفنان/ شريف رمزي واستاذ/ محسن بغداد “المدير التنفيذي لشركة النصر” واحنا حبينا ننتظر الموسم المناسب لنزول الفيلم بالاضافة الى الاحداث الارهابية والظروف التي تمر بها مصر الان ودخول شهر رمضان ولكن تم الاستقرار اخيرا على موعد نزول الفيلم بين العيدين الفطر والاضحي
وعن اغاني الفيلم قال : من المفترض نزولها قريبا على شاشات مزيكا وكام قناة تانية كنوع من انواع الدعاية للفيلم
واخيرا تحدث لنا المخرج/ محمد جمال وقال : دي تاني تجربة اخراجية ليا ، والفيلم بيدور حول 3 شباب بيحضروا حفلة للشاب خالد وقصة صعودهم في مجال الغناء بعد لقائهم لفتاة كانت متربية معاهم في المنطقة الشعبية وبترجع من الخارج وبتحصلهم نقلة في حياتهم ونتيجة ده بيقعوا في مشاكل ومطاردات ،
وبالنسبة لاغاني الفيلم هي تم تصويرها بتكنيك اجنبي شوية وبـ 3 كاميرات لان شكل الاغاني متنوع وجديد بيشبه الهيب هوب وكل اغنية اتصورت في يوم لوحدها وحتى اماكن التصوير كانت كتيرة جدا عشان يبان الفرق اللي حصلهم في طريقة حياتهم ، فسافرنا البرازيل وصورنا هناك وده كلف المنتج الكثير ، و مفاجأة الفيلم بيشارك كمان معانا منظم الحفلات وليد منصور في الفيلم بشخصيته الحقيقية
وعن تمثيل اوكا واورتيجا في فيلمهم الثاني قال : تمثيلهم كويس جدا والناس هتشوف ده على الشاشة وهما بيأدوا بطبيعية من غير تكلف او افتعال ودمهم خفيف وده هيبان نتيجة التصاعد الدرامي اللي في الفيلم بالاضافة انهم معاهم ممثلين تقال زي: هيام الجباعي ومنذر رياحنة وعايدة رياض وهما بيتقبلوا اي ملحوظة ومكنوش متعبين حتى في انفعالتهم فالشخصية الواحدة ممكن تبقى هادية في منطقة وعنيفة في منطقة تانية في نفس المشهد
وعن عدد اغاني الفيلم قال : الفيلم فيه 5 اغاني لاوكا واوتريجا وشحتة واغلبهم من تلحين “اوكا” وفيه اغنية هتغنيها “هيام”
حضر الحفل : مدير اعمال اوكا واورتيجا : منطم الحفلات وليد منصور ،والمنتج الفني للفيلم /عادل سالم ، والمغني/ حسام الشرقاوي والذي سيشارك بالفيلم باغنية “30 وش ” وهي من كلمات/عزة الزرقاني وألحان/ سامي عدلي ، في تتر النهاية بالاضافة الى المغني الصاعد / محمد حبيب و البودي جارد / لوجي
يذكر ان اسم الفيلم المبدئي كان “واحد بيسوق واتنين في الصندوق” ، ونفذ انتاج الفيلم شركة اي فيجين
