جريدة أحوال مصر
احتفلت المطربة الشابة / زيزي عادل بإصدار احدث ألبوماتها في السوق بعنوان “انا انثى” بفيلاتها بالمقطم
في البداية اقامت زيزي مؤتمر صحفي شاركها به كلا من: المدير التنفيذي لشركة مزيكا / هشام الجزار و المخرج ومدير التصوير والماكير الاردني/ جاكوب لمبز ثم قاموا بتقطيع تورتة الألبوم احتفالا به مع اسرتها واصدقائها وكل القائمين على الألبوم
ألبوم “انا انثى” يحتوي على 12 اغنية وهم : انت اللي بدور عليه ، مازال البحث جاري ، عيوبه كتير ، كفاياك ، بحب كل حاجة فيه ، انا جاية ، مستغربة ، سيبت نفسي ليه ، شايلاهالك ، مش هعمل حساب حد ، انا مبسوطة ، انا انثى ، وهذه الاغاني تتنوع بين : الهاوس والمقسوم والهيب هوب ولاول مرة “البوسا نوفا” وهي نمط من الموسيقى الشعبية البرازيلية
وقد كان لنا هذا الحوار المطول مع “زيزي” والذي قالت به :
ردا على سؤال كيف خرج لنا اخيرا ألبوم “انا انثى” فقالت : انا عملت الألبوم في 3 سنين ونص وده كان متعب اوي فكريا وذهنيا بالاضافة الى انه مكلف لانه من انتاجي والفيديو كليب كمان مكلف بس انا حبيت اخوض التجربة للنهاية وحبيت اكون حرة محدش يحركني او يديرني سواء في اختيار الاغاني او اللوك ، وانا كنت متعاقدة قبل كدة مع شركة روتانا لكني حسيت اني عايزة اعمل الحاجة اللي انا عايزاها بدماغ زيزي ويارب تكون دماغي عجبت الناس ، و بداية انا فخورة اني اتعاملت مع كل الناس اللي اشتغلت معايا في الألبوم وخاصة مع المخرج الاردني/ جاكوب لمبز ودي مش اول مرة اشتغل معاه لاني انا صورت معاه اغنية “شايلهالك” ومؤخرا “عيوبه كتير” وانا باشكر كل اللي فوقوا جانبي وانا بهدي هذا الألبوم اهداء الى روح ابي الحبيب واشكر امي واخواتي على دعمهم لي
وعن الغيبا الطويل قالت : كانت نتيجة اسباب كتيرة وهي حالة البلد ووفاة والدي وكانت فترة بعيد ترتيب افكاري لكن ان شاء الله الالبوم الجاي هكون اسرع من كدة لاني خلاص خدت خبرة
وسعيدة اني مضيت مع شركة مزيكا لني بالنسبة لي شركة مزيكا شركة كبيرة وليها خبرة وليها تاريخ في السوق وده كان مهم بالنسبة لي عشان اقدر اسوق احسن الالبوم وهما بيوزعوا الالبوم بس لكن حفلات الليف بتاعتي
وعن عدد اغاني الالبوم قالت : الالبوم فيه 12 اغنية 6 لحني و7 كلماتي والاغاني التانية انا اتعاملت مع شعراء وملحنين وموزيعين سعيدة اني اشتغلت معاهم ويارب الالبوم يعجب الناس
وعن فكرة كتابة شعر الاغاني قالت :دي مش اول مرة اكتب فيها لاني كتبت اغنية “يا مصر “ودعاء ديني اسمه “يارب “واغنية لرمضان بعنوان “حالو يا حالو ” والثلاثة كانوا كلماتي وألحاني ، لكن دي اول مرة اكتب وألحن في ألبوم ، وانا حبيت اعرف الناس على “زيزي” الملحنة والشاعرة غير زيزي المطربة اللي هما عارفنها بالاضافة لزيزي كعازفة لاني عزفت صولو قانون في اغنية “مازال البحث جاري” لاني خريجة في معهد الموسيقى العربية ، قسم قانون وبيانو ، وعن فكرة تأليف اغنية او تلحينها لمطرب اخر قالت : ممكن جدا اعمل ده وهأكون مبسوطة جدا وانا بعمله
وعن افكار الاغاني قالت : هي بتدور حول 7 مواضيع جديدة ومختلفة واكيد انا ما عشتش السبعة لانهم مختلفين ، ففيه واحدة غلطت مع حبيبها في اغنية سيبت نفسي ليه ” – واكيد مش انا- وواحدة بتقوله عمري ما حسيت اني انثى وواحدة زهقت من كلامه ، وواحدة بتقوله انت اللي بدور عليك وواحدة بتقول عيوبه كتير واغنية مستغربة ان واحدة بتقول لحبيبها انت ليه بارد كدة وعايز بعد ده كله نبقى صحاب ، وانا اغلب الاغاني اللي بكتبها بجيب افكارها من الناس اللي حوليا من صحابي فواحدة تقولي بجد مش طاياه ده كله عيوب ، فاخد الكلمة واعيش انا في الموضوع
وعن فكرة اظهار عيوب الحبيب في الألبوم قالت : الالبوم مش كله ضد الرجالة زي الثلاثة اغاني دول لكن فيه 3 اغاني تانية معاه زي : انا مبسوطة عشان هي مع حبيبها وانت اللي بدور عليه فهي لقت حبيبها خلاص وشايلهالك انه عمل معاها جمايل كتير وطلع راجل ، افانا مبسوطة اني قدرت اوصل للمعادلة اني اعمل اغاني ترضي الكل وتكون مواضيعها مختلفة فهتلاقي الرومانسية وهتلاقي الدراما
وعن الاغنية القريبة منها قالت : فيه اغنية منهم عايزاها تبقى بتاعتي هي “انا مبسوطة” وهي بتتكلم عن واحدة مبسوطة كل ما عينها بتيجي في عين حبيبها فانا نفسي اعيش الحالة دي لما احب
وعن تقليد لوك الفنانة الامريكية/ مايلي سايرس قالت : انا واحدة بحب التغيير فانا قررت اقص الجناب واقصر شعري من فوق واسيب الاوصة طويلة لكن “مايلي” مقصرة شعرها خالص وعاملاه سبايكي على قدام لكن الناس لما شافت البوستر وشعري راجع لورى ومثبت خافوا من ده وكمان افتكروا اني هقلد الكليب بتاعها واتفرجوا على كليبي للاخر لقوا مفهوش حاجة مثيرة ، بس انا ضحكت عليهم ومحصلش حاجة !!!
اما عن تاتوه النجمة اللي كان اعلي ظهرها في الكليب فقالت : هو ليس تاتوة دائم ، و ليس له علاقة بالسياسة او اي معتقد ولكنه علامة مميزة عند جاكوب على يده وعلى ظهره فانا اخذت منه لوك شعره ولوك النجمة وقمت بازالتها بعد تصوير الكليب فجاكوب يعتبر ساب بصمته عليا في الكليب
وهل وافق المخرج على اللوك الجديد فقالت : جاكوب كان من اوائل الناس اللي رفضوا اني اقص شعري لانه بيحبه طويل وكان شايفه حلو وخسارة نقصه فممكن نلبس باروكة فلما كلمته رفض جدا ورد جاكوب وقال ما تخديش الخطوة دي غير لما اكون موجود على اساس انه هيمنعني بنفسه لكني طلعت اقوى منه رغم كل الانتقادات والهجوم عليها بسبب ده ، وعن الشعر اللي اتقص ماذا فعلتي به قالت : عملته ديل حصان !!!
وعن الغناء بالفصحى او باللهجة الخليجي واو البناني فقالت : عادي ممكن اعمل ده لو الاغنية حبتها ولقتها قريبة لقلبي وكلماتها ولحنها هغنيها
وعن دخولها مجال التمثيل قالت : اتعرض عليا ادوار كتير لكني ماحستش نفسي في اي حاجة منهم وحابة ان تكون البداية بواحدة شبهي لقية شخصيتي فيها بس اهم حاجة مايكنش اول دور ليا شريرة عشان الانطباع الاول عند الناس هو اللي بيدوم ، فنفسي اكون بنت عادية في الكلية عايشة مع اهلها فتقابل حبيبها وعايشة قصة حب
وعن ادوار الاغراء قالت : انا عمري ما عملت ده في الغناء ، وفي كليباتي وظهوري في الميديا ، فازاي هقبل بيه في التمثيل فانا باخد بالي من لبسي ومن شكلي فده مش سكتي ، وفيه ادوار ممكن تتعالج بشكل مختلف فلو راقصة ففيه بدل رقص الان تغطي الجسم كله زي الفستان ، لكن الدور نفسه لو اتعرض عليا مش هرفض لو منطقي انه مثلا بنت فقيرة فاضطرت لده في اطار الموضوع اللي بنوصله للناس ، لكن القبلات والمايوة مرفوض تماما
وعن حلمها بالغناء دويتو مع مين من النجوم الكبار قالت : الهضبة عمرو دياب ومن السيدات : انغام وشيرين
وعن ماذا يميزها عن غيرها من بنات جيلها قالت : انا بشوف اني مواكبة العصر والموضة وايه اللي بيحبه الشباب اللي في سني الليبيحبوا الكلام الجديد
وعن جديدها قالت : محتاجة ارتاح بعد مجهود الألبوم ده شوية وبعدين اقرر هصور اني اغنية من الألبوم تاني عشان تنزل في الصيف واحتمال تكون حاجة من اللي رتمها سريع ،وانا سألت جاكوب واحتمال اعمل استفتاء عليها بين الناس عشان انا بحب ان الجمهور يشاركني في شغلي ، والمفروض عندي حفلات برة مصر لسه هتعاقد عليها قريبا
حضر الحفل : من الاقارب : والدة زيزي واخواتها : الماكيرة/ غادل عادل وزوجها / حمادة الحلو وندى عادل وغدير عادل ،واصدقائها : رامي ، هيثم نبيل ،سمر مجدي ،نانسي ، والقائمين على الألبوم : محمد شفيق ،احمد برازيلي ،السيد علي
يذكر ان ألبوم “انا انثى” هو الابوم الثالث لزيزي بعد ألبوم “واحدة طيبة” وألبوم “وعد عليا” ،و قد ظهرت “زيزي” بالمؤتمر بفستان من قطعتين من تصميم المصمم الاردني/ ليث معلوف ، و اغنية ” انا مبسوطة” التي تحبها هي كلمات والحان : زيزي عادل ، توزيع و فواصل موسيقية: محمد عاطف الحلو ،جيتار : شريف فهمي ، ساكس فون : نور عاشور ،ويقول مطلع كلماتها : انا مبسوطة اوي كدة ليه كل ما عيني تيجي في عينيه ، بسرح خالص وبدوب فيه ، شدتني عنيه مش عارفة انا ليه ، مش عارفة اللي بيحصلي ده ايه ايه ، انا مبسوطة اوي كدة ليه ؟
