أحمد هارون كراوية

أحمد هارون كراوية يكتب… الكتابه بالديناميت (2)

لما المواطن الفرنسى صفع رئيسه بالقلم على وشه قامت الدنيا ولم تقعد فى العالم العربى والاسلامى وهات يا زغاريد وتهليل وشماته وعداله السماء وانتقام المولى عز وجل ورقص على انغام مزيكا حسب الله
في حين أن الصفعه دى كانت على قفانا احنا مش على وجه الرئيس الفرنسى
لان الموضوع ببساطه واللى بيلخص الفرق بينا وبينهم أن الناس دى وصلت لمرحله أنه لا مقدس فى مواجهه قيمه الفرد كل الحكايه أن المواطن اتحكم عليه طبقا للقانون الفرنسى لاهانه موظف حكومي بشكل غير لائق فى حين انك انت يا مؤمن لا قدر الله وربنا ما يكتبها عليك عملتها مع مخبر فى بلدنا من غير ما احلفلك وانت فاهم الكلام ده كويس ماعدتش شايف اهلك مدى الحياه ده لو ما اضربتش بالنار فى لحظتها
احنا شعوب ادمنت جلاديها وصنعت العجل وعبدته آلاف من العجول صنعناها وقدسناها وعبدناها من دون الله
ملايين المقدسات اللى بتخر ساجد فى ملكوتها وبتسبح بحمدها كل لحظه من حكام ورؤساء وملوك وأمراء ودعاه وادعياء ونجوم كوره
وفن وإعلام وأصحاب سلطه ونفوذ وعصببات
العجل المقدس اللى صنعناه يقش فى مواجهه الفرد
هو ده الفرق ببساطه
عمرى ما كان عندى مشاكل مع العجول المقدسه مشكلتى الكبرى مع من صنعوها و اضفوا عليها الهاله والجلال والقداسه
حد يتلقى دلع وما يتدلعش
المعركه معركه وعى بتتطلب كسر كل الأصنام والعجول المقدسه للوصول إلى المقدس الأوحد سبحانه وتعالى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *