اشياء لله

سايبين الدنيا ودلوقتى

بنعض فى  بعض

ناسيين مشاكلنا وبنقلب

فى مشاكل بعض

ياصحابى بلاش

أصل القشاش.مابينجزشى

والاكسبريس

طاير طيران مابيستناش

والى مايسواش

عامل فاهم

مع انة حمار مافيفهمشى

والى بيتقال غير الحاصل

والحاصل من ضرب الميت بكلام مسموم

يديلك صفر

والحاصل من طرح الطيبة من قلب اخضر

يديلك أهر

والحاصل من جمع الاحزان على حد حزين

يديلك طفر

والحاصل من قسمة ونصب عند المؤمن

يديلك صبر

والصبر جميل

والى بيصبر حتما هاينول

والنول مابيغزل غير التوب

والتوب سترة

والسترة فى لقمة وحبة ملح

مش بالكترة

والكترة ماتغلش شجاعة

والشماعة

بنعلق لية الدنيا عليها

ونشوطها ونتمحك فيها

ونقول مظاليم

ونولول ونشق هدومنا وندق لطيم

ونجيب أبو قرش على ابو قرشين

والحسبة اخرتها خسارة

والطيارة

بتلف الدنيا فى دقيقتين

لكن العين

اسرع منها

خليك واعى

بص امامك

لية معجب دايما بالرجلين ؟

الفاتحة احلا من الضمة

ماتبص هناك يابن العمة

فى الارض مافيش غير طين وتراب

بالزمة دة ينفع بالزمة ؟

يابنى الحيوان .. مفردها حياة

وحياتك واحدة ماتخسرهاش

اصل الى اتعاش .. مش قد الجى

والجى دة فينة وفين احنا

لو تزكر ربك فى المحنة

تلاقيها تهون

والهون .. طحان

فماتدخلهوش

خليك براة ماتقربلوش

علشان تسلك خليك نفسك

واوعاك تمشى فى طريق غيرك

مش عيب انك تاخد حقك

واما تسامح كتر خيرك

واتذكر دايما ان المركب مش تايهه

ولا غرقانة

وطريقها نجاة

طول مانتى معلق فى قلوعا

أشياء لله …

 

اترك تعليقاً

لن يتم نشر عنوان بريدك الإلكتروني.