لأني حقيقي متجرد

لأني حقيقي متجرد
بقيت يا مصر متمرد
و حلمي الدين يناديني
بصوت وطنه مدفيني
ونيل سارح ف شرايني
فهل من حلمي أتجرد
لأني حقيقي متجرد
بقيت يا مصر متمرد
و حلمي نكون سواسية
مش جماعات و وسية
وطن فتة في شعرية
فهل من حلمي أتجرد
لأني حقيقي متجرد
بقيت يا مصر متمرد
و حلمي يطوف ع الابواب
يأذن .. يسمعوا الخطاب
بهية و الميدان محراب
فهل من حلمي أتجرد
لأني حقيقي متجرد
بقيت يا مصر متمرد
و حلمي مافيهوش كرسي
و شيخ مش شيخ بيفسي
و دين ع الكرسي بيمسي
فهل من حلمي أتجرد
لأني حقيقي متجرد
بقيت يا مصر متمرد
و حلمي عم عب جواد
ف حنة مرقص الحداد
يرقوا بالنبي الحساد
فهل من حلمي أتجرد
لأني حقيقي متجرد
بقيت يا مصر متمرد
أنا حلمي راجع تلاتين
فارش ناسنا فالميادين
وطن واحد و عوده متين
فهل ينفع نكون نكره
و هل نقبل نبيع بكره
و هل دينا صبح أكرة
جاوب و انت متجرد
تكون لمصر متمرد