جريدة أحوال مصر
في القلب يا أقصى
في عز ما العرب مهموم
بشبح في الوطن مشئوم
تايه يا أقصى حزين
في قلب نظام مزعوم
صرخت كتير ولسه بتصرخ
الصرخة في قلبي بتشرخ
عيونك فوق في السما
وأنا ع الأرض بصرخ
قلبي ف هواك دايب دوب
وحبي ليك ما يشوبه شوب
الدمع ع الخد سايل بحور
والحزن عليك فايض في القلوب
صبح صباحك صباح غروب
وف كل لحظة تعدي تزيد الذنوب
مالنا كده متفرقين يا عرب
شرق وغرب شمال وجنوب
وشك يا أقصى من الدخان مخنوق
دمعة طفلك في رقابنا طوق
دين علينا تشرق شمسك
ماهو وإن طال الغروب لابد من شروق
ضرب الجبان ضرب دخان
فاكر الخرفان إنه أُلعبان
أخد الجبروت له عنوان
ونسي إنه أنا السجان
يا شايل سلاح متعدد
إوعاك تفتكر إني بتهدد
أنا هنا لاجل مامنعك
تنام في أرضي وتمدد
لا سلاحك ولا طيرانك
يقدر يغير عزيمتي ف حرمانك
من سلبك أرضي ومكاني
من حقي في إذلالك وإعدامك
أنا عمري ضارب في البلاد دي
عمر آدم جد جد مليووون جدي
وهتفضل عمق الجذور في الأرض
عمر ولد ولد مليووووووووون ولدي
محمد فضالي (15/9/2015)
